ألمجتمع المدني ... والمؤسسات المدنية

بين المدام الضجراني والشأن العام والمؤسسات المدنية ...

ضعنا وضيعنا العالم

صرنا نستحي نقول نحنا جمعية

• جمعية جميع القديسين: على التلفون ...صوت بيدعيك من السما لتكون كريم و شهم و معطاء متل ما تعودنا عليك كل سنة ... و كل سنة بتروح معك بالحيا 20$ ...صورة ...ومجمع مربى ...لحد ما علموني قول انا باجتماع او هلق طالع على الطيارة ... و مش راجع بقا
• جمعية المدام واصحابا: عاملة عشاء a 200$ seulement لحماية اسعار البوتوكس ... لانو زبل وصارت بنت الكونسيرج فيها تعملو
• جمعية البيك و مصرياتو: واهدافا حل مشكلة الشرق الأوسط و شمال افريقيا عامة ... و فرك مناخير بيت الشيخ ونترق البلدية والمخترية
• جمعية بيل غيتس فرع لبنان - حارة التحتا : بعد ما جمعنا المصريات ...والرزقات ...صار وقت prestige

Go green , save the nature , ما بيهم

اصلا كلمة جمعية من جماعة يعني على قولة زياد الرحباني : هي فرقة عالم مجموعين

فقدت قيمتها وصار لازم نبش على كلمة جديدة تحدد اكتر دور هالجماعة

بالعالم المتحضر في شي اسمو مؤسسات مدنية دورها تكون :

1. متخصصة: يعني اذا اهدافها طبية يكون فريقها لمع بمجال الطب وصار اذا حكي سمعنا درر و خبرة واهم شي عم تسمع حل. راح زمن الكاراج يلي بيصلح كل شي ... هيدا زمن الأختصاص

2. لاتبغي الربح: وهيدا ما بيعني لابسين خيش وعايشين بمغارة بس كمان مش المكتب والديكور بيطعمو ضيعة.

3. تؤمن بالشراكة : مش كل قبيلة عندا جمعيتا و يا محلا حرب القبايل عند حرب الجمعيات. شراكة حقيقية ...شراكة مصلحة عليا واختصاص وبعد العمر الطويل عبر اللامركزية الأدارية الكل بيشارك بادارة المجتمع ونموو

مؤسسات لاتبغي الربح

هيدا يلي بدنا ياه ومش بس بعلم و خبر ...بمعايير و مراقبة

الجمعية لما بتقطع شوط بالأدارة و الأختصاص بتبطل بس فكرة بتصير مؤسسة

الجامعة مؤسسة - الصليب الأحمر مؤسسة - وسيلة الأعلام مؤسسة - ما بقا فينا نكمل كيف ما كان

اذا لتزفت جورة بدك تصنيف بوزارة الأشغال

بس فيك تفقع حلقة عن سلامة الغذاء بلبنان تهشل السواح على 10 سنين يا بطل...

فيك تعمل نايب و تشرع : أذا كنت تحسن الكتابة والقراءة

فيك تمسك مشاريع بملايين الدولارات لانو عندك غطا سياسي حتى لو كنت بتفهم تنمية قد ما بيحكي صيني

اذا مؤسسات مدنية متخصصة

لاتبغي الربح هيدا شي تاني هيدا خيار...

الحياة الرهبانية " لا تبغي الربح" بتزرع لتكفي حاجتها للغذاء والباقي مفروض توزعوا

" لاتبغي الربح " صار خيار جدي عند كتير من الشركات التجارية بزمن قل هامش الربح وصار النجاح اذا غطينا أجورنا و مصاريفنا

مين لازم يصنف ؟ هون رح تدبك

وزارة الداخلية ؟ البلديات؟ البيئة؟الرياضة ؟ الشؤؤن الأجتماعية؟

انا بقول وزارة اللامركزية الأدارية... مع موافقة كل وزارة معنية حسب أختصاصا

عندي طلب لوزارة اللامركزية الأدارية اذا في حدا يساعدني

المستدعي : مؤسسة بلدتي المتخصصة بالتنمية عبر التكنولوجيا والتي لا تبغي الربح ....بس ما بدنا نشحد

الموضوع : أيمتا الفحص؟