يا أهلا ومرحبا بسنة الجديدي      الفيها تلاقت وجوه السعيدي

وجوه بنورها متل المنارة           قريبي للقلوب ومش بعيدي

وما زالو ليلنا أحمل عبارة           بجمع الشمل ونفوس الحميدي

بدّي إنظم الشعر بغزارة             حتى تكون ليلتنا فريدي

سنين الماضي راحت خسارة      حرب،والحرب شغلي مش مفيدي

المفيدي إلفة حسين وبشارة          ونجاة وناديا وليلى وحميدي

وحنّا يعمل لأحمد زيارة             وعلي يسابق ميشال بهالعقيدي

حتّى بكل بيئة وكل حارة            يبقى حبّنا بيت القصيدي

بدنا نعيش إسلام ونصارة          ونمشي عا فرد خطّة وحيدي

لأنّو الطائفيي بالتجارة             عملت كل لبناني طريدي

بقرآن النبي طفل المغارة           بأحمد بشّر بصفحة مجيدي

وبإنجيل المسيح شفنا عبارة         التسامح شيمة المؤمن أكيدي

وشعب لبنان مجبول بطهارة         وإلو حسنات بالدنيا عديدي

لكن هالوجوه المستعارة             بين الخّيين عملو هالمكيدي

علينا بلادنا نجدّد عمارا              ويرجع جيشنا بقوّي شديدي

ويحفظ هالوطن من كل غارة         ويعود الأمن عالبنان كلو

ساعتها نهار سعدي ويوم عيدي